دكالة 24 :
حصاد الريح
شبيهي في المحنة
رفيقي في ظلام الحال
فلاس هاذ العالم فلاس
الجوع واللهطة فاتت لقياس
وبنادم فيك يا دنيا دمور خاص
والعيشة صبحت محال
*****
شكون ﯕال
ضو الولف ﯖفّا
لا مْحنّنّة لامن ميزانو وفّا
حيرة هي يا ولفي وتَلْفَة
وقف الوقت مشات ليام الباهية
من حسو سكت الحس
والجايحة كملت الباهية
في طريقها حصدات صغير وكبير
تهولت الذات وتقطع النفس
حارت لذهان العيون باكية
والناس عل الحق ساهية
******
كنا خاوى كنا عشران
كنا حباب كنا جيران
كنا وسط ورد والطير يغني ألحان
واليوم ياويحي
كلشي ملسوع
من الصدمة مفجوع
بحال المسجون بحال السجان ..
جات سلاطة على غفلة
على غفلة بلا شوار
تحصد لرواح
في ظلام السهو مابان لينا صباح
مادرنا حساب
ما تسترنا بحجاب
مابنينا للصحة سوار
*****
شبيهي في المحنة
رفيقي في ظلام الحال
فلاس هاذ العالم فلاس
الجوع واللهطة فاتت لقياس
وبنادم فيك يا دنيا دمور خاص
والعيشة صبحت محال
******
ضاق الكون وكساد الصرف
ﯕدام لفجيعة
لا تجارة رايجة
لا مواج هايجة بالبحارة
بلا سلاح بلا عزلة
طواتهم لخديعة
واللي بكا مور الميت
بكاه بلا عزا خسارة
******
شكون ﯕال داك اللي ماشفناه
ما ريناه
صغير شانو وتسلطن
هجم بلا شرع وتشيطن
خرب شلا بلدان
مانفع مالها
وجيوشها مابانو
ما هو واد واحمل
ما هو عدو واجفل
صغر من حبة ودار قبة
وطلق نيابو وفرعن
كل واحد واش يﯖول
ما عرفنا سباب
ما لقينا معقول
مخبول هاذ العالم مخبول
المعنى بينة والسطر في جبين الزمان محفور
راه بنادم ببنادم من دهرو مغدور
*****
شبيهي في المحنة
رفيقي في ظلام الحال
فلاس هاذ العالم فلاس
الجوع واللهطة فاتت لقياس
وبنادم فيك يا دنيا دمور خاص
والعيشة صبحت محال
*****
ما في الهم غير اللي يفهم
القلب ينزف
والعقل تصدم
الرعب حوم في الاوطان
ها الميت بلا كفن
ها المرمي حتى تعفن
ها اللي جاع ها اللي في الهيف تفنن
ذابت خيي لقلوب
والحبس مارضيناه لينا مكتوب
لا دوا ينفع
لا عطار يشفع
الشكوى ليك يا مولانا
انت الرحمة وفيك رجانا
تزول الغمة وترجع اللمة
ملي نفهموا بلا خرافة
بلا عرافة
هاذ لبلا الفتاك منين جانا ..
الله ..الله يا مولانا
انت الرحمة وفيك رجانا ..
الجديدة في : 26 /أبريل 2020 منتصف الليل
محمد كابي
المصدر : https://www.doukkala24.com/?p=2310
